Басты бет

Қазақстан Республикасы Мемлекеттік орталық музейі Қарақалпақстан Республикасының Мемлекеттік тарих және мәдениет музейі коллекцияларының «Аралбойы маржаны» көрмесі 15 қыркүйектен 20 қыркүйек күніне сағат 16.00-ге (ашылуы) техникалық себептер бойынша ауыстырылатынын хабарлайды. Алдын-ала кешірім сұраймыз.

Қазақстан Республикасы Мемлекеттік Орталық Музейі 2022 жылдың 15 қыркүйегінде сағат 16.00-де Қарақалпақстан Республикасының Тарих және мәдениет мемлекеттік музейі ынтымақтастығы аясында «Аралбойы маржаны» жылжымалы көрмесін ашады.

Көрме мақсаты: музейге келушілерді Қарақалпақстан Республикасының материалдық және мәдени мұрасымен таныстыру арқылы музей жинағын қалың жұртшылық арасында кеңінен насихаттау. Сондай-ақ халықаралық мәдени байланыстарды одан әрі нығайтуды, бауырлас екі ел музейлері арасында тәжірибе алмасуды көздейді.

Ұлттық мәдениет пен өнер – әуелден-ақ кез-келген халықтың тарихы, дәстүрі, дүниетанымының және оның басқа халықтармен этномәдени байланыстарын қалыптастырған.

«Аралбойы маржаны» тақырыптық көрмесі қарақалпақ жұртының тек тарихи ғана емес, дәстүрлі мәдениеті мен өмір салтын қатар көрсетер археологиялық және этнографиялық коллекцияларын ұсынады. Қарақалпақстан тарихы мен мәдениеті музейінің коллекциясында әсіресе, XIX-XX ғғ. халықтық сәндік-қолданбалы өнерінің сан алуан үлгілері жақсы сақталған.

Көрме экспозициясында қарақалпақ әйелінің ұлттық киімі мен зергерлік әшекейлері ерекше көз жауын алады. Осы қатарда кимешек пен орамал (ақтүрме), әйел және ерлерге арналған шекпен, қамар белдік, белбеу, жеңқап (жеңұш); сырға, түйме, білезік, тұмар, әсем салпыншақ, омыраулық сүйір (алқым) әшекейлер, «шар» алқа түйме, «төбелік», «өңірмоншақ» және «өңірше» аталатын қызбалаға арналған сәндік әшекейлер түрлі тастармен көмкерілген.

Қарақалпақ киімінен қарапайым тоқылған матаға жібек жіптермен кестелей түсірілген кішкене «айқас» (крестімен) өрнекті тігу техникасын да көре аласыз. Ақжегде (бас киім), ақкимешек, көк көйлек сынды әйел киімінің үлгілері мерзімі жағынан ең көнесі және Орталық Азия халықтары арасында кең таралғаны. Мәселен, кимешек – тұрмыстағы әйелдің дәстүрлі өзіне тән костюмінің міндетті бөлшегінің бірі, әрі ол өзінің күнделікті және салттық қолданыста болуымен ерекше назар аудартады.

Қарақалпақ халықтық-қолданбалы өнері де көркем шығармашылық ерекшеліктерге ие. Аталған туындылар көрмеде түрлі сәндік пішіндегі ою-өрнек нақыштары әр алуан экспонаттар арқылы да ұсынылған. Осы қатарда сандық пен ыдыс-аяқ, XIX-XX ғғ. тән ат-әбзелдері де бар.

Көрмеге бейнелеу және сәндік-қолданбалы өнер туындылары да қойылған. Экспонаттар қатарында халықтың дәстүрлі мәдениетін бейнелейтін танымал қарақалпақ суретшілері (ХХ ғасыр) — К. Бердімұратов, А. Сейтімбетов, Ф. Мадғазин, А. Өтегенов, М. Антонов, Г.Абдурахмановтардың өнер туындылары бар.

Көрменің жеке бөлімі Қарақалпақ жерінің табиғатына тән жануарлар әлемі мен өңірден табылған табиғи минералдар мен кристалдарға да арналған.

Қазақстан Республикасында өткізіліп жатқан аталмыш көрме – қарақалпақ халқының тарихы және мәдениетін бұқара көпшілікке таныстыру ғана емес, бауырлас елдер арасындағы халықаралық байланыстарды одан әрі нығайта түсуге қосқан елеулі үлесі болмақ.

Көрмені Мемлекеттік орталық музей директоры Харипова Рашида Ерімқызы мен Қарақалпақстан Республикасы Мемлекеттік Тарих және мәдениет музейінің директоры Юсупова Айжамал Ибрагимқызы ресми түрде ашатын болады. Іс-шараға Қарақалпақстан Республикасының Мемлекеттік Ұлттық Филармониясы қатысады.

Көрме 2022 жылдың 30 қыркүйекке дейін жалғасады.

Қазақстан Республикасы Мемлекеттік орталық музейі 2022 жылдың 6 қыркүйегінде сағат 15.00-де Отбасы күніне арналған «Мәдени құндылықтар: өнер біріктіреді» атты бейнелеу және қолданбалы өнер туындыларының жаңа көрмесін келушілер назарына ұсынды.

Жоғары оқу орындары мен колледждерде оқитын қазіргі заманғы суретшілер мен студенттер өз шығармаларында Қазақстанның табиғи жерлерінің сұлулығын, қазіргі қоғам өмірінің сюжеттерін, сондай-ақ ұлттық, тарихи-мәдени және отбасылық құндылықтарды бейнелейді. Көрмеге қойылған жұмыстардың ішінде «Ана», «Ұмай. Дүниеге келу», «Сәукеле», «Көшпенділер қаласы», «Ұлттық киім» және т.б.

Көрме музейге келушілерді бүгінгі таңда оқу орындарының суретші – педагогтары қолданатын стильдер мен жанрлардың алуан түрлілігімен, жастарды өнерге баулумен таныстырады.

Көрмені салтанатты түрде ҚР Мемлекеттік орталық музейі директорының орынбасары Ғалия Теміртон, өнертанушы Мария Жұмағұлова және суретші Бибігүл Смақова ашты.

Іс-шараға Алматы қаласының жоғары оқу орындары мен колледждерінің студенттері мен педагогтары қатысты.

Көрмеге 30-дан астам авторлық кескіндеме жұмыстары қойылған.

Көрме 2022 жылдың 14 қыркүйегіне дейін жалғасады.

2022 ж. 24 тамызында ҚР Мемлекеттік Орталық музейі Қазақстанның сәндік-қолданбалы өнер шеберлері-суретшілерінің "Қоңыр маусым" атты көрмесін ашты.

Қоңыр маусым көрмесі Көрме экспозициясы келушілерді халық шығармашылығымен, суретші-шеберлердің авторлық жұмыстарымен, қолданбалы өнердің жанрлары мен стильдерінің алуан түрлілігімен таныстырды.

"Қоңыр маусым" атты көрмесінде Қазақстанның Айман Бекжанова, Шолпан Даирова, Гүлнар Омарова, Лаура және Юрий Федотовтар, Наталья Полянских, Айгүл Рахманова, Гүлшат Джураева, Гаухар Сәбит, Бибігүл Кабулова, Наргиз Рахманова, Гүлназым Өмірзақ, FineDeco.Art шеберлері сияқты кәсіби суретші–шеберлерінің 50-ден астам интерьерлік жұмыстары қойылды. Онда бізді қоршаған әлемнің барлық палитрасы, таңғажайып сұлулық гобелендері, киіз және кестеленген панно, батиктен жасалған бұйымдар, мозаикалар, сәндік қуыршақтар мен сөмкелер бейнеленген.

"Қоңыр маусым" атты көрмесінің салтанатты ашылу рәсімінде ҚР Орталық музейінің мәдени-білім беру жұмысы бөлімінің басшысы – А.В. Кущенко, өнертанушы – М. Жұмағұлова, батик пен киіз басудан қолөнерші – Наталья Полянских, сәндік қуыршақтар жасау шебері – Гаухар Сәбит, киіз басудан қолөнерші – Шолпан Даирова құттықтау сөз сөйледі.

Сөз сөйлеушілер қатысушыларды көрменің ашылуымен құттықтап, оларға шығармашылық табыс тіледі.

Көрме 2022 жылдың 5 қыркүйегіне дейін жалғасады.

ҚР Орталық музейі 2022 жылдың 26 тамызында суретші-кескіндемеші Надирова Диланның «Шығыстың ғажайып бояулары» атты жеке көрмесін ашты.

Көрме Қазақстан ғылымының дамуына елеулі үлес қосқан ғалым, химия ғылымдарының докторы, профессор, Қазақстан Республикасы Ұлттық Ғылым академиясының академигі Нәдір Кәрімұлы Нәдіровты (1932-2021 жж.) еске алуға арналған.

"Шығыстың ғажайып бояулары" атты көрмесінің салтанатты ашылу рәсімінде ҚР Орталық музейінің мәдени-білім беру жұмысы бөлімінің басшысы – А.В. Кущенко, профессор, өнертанушы – О. Әбішева, Қазақстанның еңбек сіңірген қайраткері, суретшілер одағының мүшесі – Қайрамбаев Жұмақын Қожақынұлы,

Қазақстан Республикасы Ұлттық Инженерлік академиясының корреспондент-мүшесі, Диланның әкесі – Ариф Нәдірұлы Нәдіров, Заң ғылымдарының магистранты – Мусаева Гуле Гюльгусейнқызы және көрменің авторы Дилан Надирова құттықтау сөз сөйледі.

Музейге келушілер Д. Надированың өнер туындыларымен танысты, олардың ішінде: «Шығыс натюрморты», «Лезгинка», «Күрт ханшайымы», «Ана мен бала», «Жайлау» және т. б. бар.

Сөз сөйлеушілер Дилан Надированы көрменің ашылуымен құттықтап, оған шығармашылық табыс тіледі.

Көрме 2022 ж. 05 қыркүйегіне дейін жалғасады.

Қазақстан Республикасы Мәдениет және спорт министрлігінің бастамасымен Қазақстан Республикасы Мемлекеттік орталық музейі Ұлттық домбыра күніне орай Нұр-Сұлтан қаласында орналасқан Қазақстан Республикасы Ұлттық музейінде 2022 жылдың 28 маусым күні сағат 16.00-де музей қорындағы қазақтың дәстүрлі музыкалық аспаптары коллекциясының негізінде «Сырлы аспаптардың сиқырлы үні» жылжымалы көрмесін өткізеді.

Қазақ халқының тарихи-мәдени, әлеуметтік және рухани өмірінде музыка өнерінің орны айрықша. Сан ғасырдан сарқылмай жеткен музыкалық дәстүр ұрпақтан-ұрпаққа жеткізіліп, халық шығармашылығының ажырамас бөлігіне айналды. Музыкалық мәдениетіміздің негізін ән-күй, ауызекі дәстүрге негізделген суырып салмалық, эпикалық, сондай-ақ аспаптық шығармалар құрайды. «Сырлы аспаптардың сиқырлы үні» көрмесі – бірегей қазақ мәдениетіне қалтқысыз қызмет еткен өнер майталмандарының көзіндей болған сырлы аспаптардың сиқырлы үнін жеткізеді.

Көрменің мақсаты: мәдени астанамыз Алматы қаласында орналасқан ҚР Мемлекеттік орталық музей қорында сақтап, ұрпақтан-ұрпаққа жеткізіп отырған қазақтың ұлттық дәстүрлі бірегей музыкалық аспаптарымен таныстыру.

Көрмеге қазақ халқының әйгілі әнші-сазгері, ақын Жаяу Мұса Байжанұлының 1955 жылдың мамыр айында музей қорына ұлы Салық тапсырған домбырасы мен ішектері жылқының қылынан жасалған қобызы, қазақтың ұлы ақыны Абай Құнанбайұлының жары – Ділда Алшынбайқызының 1978 жылы музей қорына Абайдың шөбересі С.А.Ысқақовтың тапсырған қос ішекті, сүйектелген қалақ домбырасы, қазақ опера өнерінің негізін салушылардың бірі, әйгілі әнші Күләш Жасынқызы Бәйсейітованың анасы тапсырған атаулы домбырасы қойылады. Сонымен қатар, қазақ тарихы мен мәдениетіндегі шоқтығы биік тұлғалар – Әміре Қашаубаев, Манарбек Ержанов, Елубай Өмірзақов, Қаныш Сәтбаев, Қасым Аманжолов, Жұбан Молдағалиев, Кемел Ақышев, Өзбекәлі Жәнібеков сынды ғылым, мәдениет және өнер майталмандарының музыкалық аспаптары көрермен назарына ұсынылады.

Сондай-ақ музыкалық аспаптардың ішекті, үрмелі, тілшелі, соқпалы түрлері – жетіген, шертер, қобыз, шаңқобыз, асатаяқ, тұяқ, қоңырау түрлерімен қатар домбыра жасаушы қолөнер шеберлерінің бұйымдары, барлығы 175 жәдігер көрермен назарына ұсынылады.

Өтетін уақыты: 2022 жыл 28 маусым сағ. 16.00

Өтетін орны: ҚР Ұлттық музейі, Нұр-Сұлтан қ-сы, Тәуелсіздік даң-лы, 54

Көрме 2022 жылдың 28 маусым – 13 шілде аралығында өтеді.