Қазақстан Республикасы Мемлекеттік орталық музейінде 2023 жылдың 11 сәуірі күні сағат 15:00 де, 1916 жылғы Торғай уезінде өткен Ұлт-азаттық көтерілістің бас сардары, теңдік жолындағы күрескер батыр - Амангелді Имановтың туғанына 150 жыл толуына орай «Халықтың ұлы, хас батыры Амангелді» әдеби-сазды кеші өтеді.

Амангелді Имановтың есімі қазақ халқының тарихындағы аса бір даңқты кезең - 1916 жылғы ұлт-азаттық көтеріліспен тығыз байланысты.Осы кезде Амангелдінің ұйымдастырушылық және қолбасшылық таланты айқын көрінген еді. Оның қол астындағы 50 мың сарбазы ерліктің, табандылықтың тамаша үлгісін көрсеткен.

Әдеби-сазды кеште Орталық музейдің «Қазақстан тарихын зерттеу» бөлімінің ұйымдастырған көрмені тамашалауға болады. Көрмеде Торғай көтерілісінің жетекшілері мен оның қатысушыларының тарихи рөлін айғақтайтын фото-материалдар қойылады. Ерекше орынды көтеріліс жетекшісі А.Имановтың жеке заттары (атыс қарулары мен суық қарулары, ұсталық инструменттері) алады. Экспозицияда А. Имановтың ұлдарының суреттері, «Амангелді» кинофильмі мен Қазақ академиялық театрының спектакльдерінен алынған эпизодтарының фото-материалдары ұсынылады. Сондай-ақ, халық суретшісі Ә.Қастеев пен Б. Урманченің кескіндемелері мен суреттері қойылады.

«Халықтың ұлы, хас батыры Амангелді» әдеби-сазды кешінің құрметті қонақтары Ахмет Байтұрсынұлы музей-үйінің жетекшісі, «Тіл–құрал» оқу-әдістемелік, ғылыми-зерттеу орталығының директоры, Әл-Фараби атындағы ҚазҰУ доценті, ахметтанушы Райхан Имаханбет, А.Имановтың немересі Амангельдиев Батырлан Рамазанұлы, еңбек ардагері, қоғам қайраткері, Құрмет орденінің иегері, Ұлт жанашыры - Сарқытбаева Дәрия Әбіқұлқызы; журналист, ақын, сазгер, Қазақ радиосының ардагері, Қызылжар қаласының «Құрметті азаматы» Бекмағанбетов Бүркіт Мәжитұлы; ақын, сазгер - Исраил Сапарбаев пен ақын, сазгер, журналист Аманғазы Кәріпжан әулетінің қатысуымен өтеді.

Әдеби-сазды кеште Құрманғазы атындағы Қазақ ұлттық консерваториясы және П.Чайковский атындағы Алматы музыка колледжінің студенттері аталған іс шараның өтуіне ат салысып, өз өнерлерін көрсетеді.

 Қазақстан Республикасы Мемлекеттік орталық музейі 30 наурыз күні «Шығармашылық алаң» балалар суретінің көрмесі ашылды.

Көрмеге Алматы қаласының 100-ден астам балалар шығармашылығын дамыту және бейнелеу өнер орталықтарының оқушылары қатысып, бейнелеу және сәндік-қолданбалы өнер жанрдағы әртүрлі жұмыстарын ұсынды.      

Балалардың көрмеге қатысуы оларға еліміздің тарихы, өнері мен мәдениетімен танысуға, туған жерінің ұлттық құндылықтары, дәстүрлері мен сұлулығы туралы түсініктерін кеңейтуге мүмкіндік береді, бұл Отанға, өз халқына деген сүйіспеншілікті оятады. Сондықтан жас суретшілер өз жұмыстарында қоршаған әлемге, елдің өткені, бүгіні және болашағы туралы өз көзқарастарын білдіруге тырысты. Балалар Қазақстанның тарихы, мәдениеті, табиғатымен байланысты түрлі аспектілер мен сюжеттерді бейнелейді.

Көрмеге Алматы қаласының «Да Винчи», «By ArT», «АртМикс», «Білім студиясы», «Класс», «ДАРиЯ» балалар шығармашылық даму орталықтарының оқушылары қатысты, сондай-ақ концерттік бағдарламаны белсенді қатысушылары, музейдің серіктестері - «Семь чудес света» балалар театры, «Ай-кербез» би тобы мен «Фиеста» би ансамблі қолдады.

«Шығармашылық алаң» көрмесін ҚР МОМ директорының орынбасары Сержан Бараханұлы Саров, шығармашылық мектептердің жетекшілері Елена Николаевна Исакова және Анна Алексеевна Чернышева ашты.

«Шығармашылық алаң» атты көрмесінде балалардың 100-ден астам туындылары қойылған.

  Көрме 12 сәуірдің 2023 жылына дейін жалғасады.

2023 жылдың 07 сәуір күні Қазақстан Республикасы Мемлекеттік орталық музейінде «ЫДЫСТАР СЫР ШЕРТЕДІ...» атты көрме ашылады.

ҚР Мемлекеттік орталық музейі қорында дәстүрлі қазақ мәдениеті мен этнографиясына қатысты бай коллекция сақтаулы. Олардың ішінде дәстүрлі ыдыс-аяқ түрлері ерекше бір коллекцияны құрайды. Қазақ өзінің қонақжайлығымен танымал болса, ондағы басты көрсеткіш дастарқан екендігі мәлім. Ал дастарқан сәні – ыдыс-аяқ екендігі баршаға аян. Дегенмен, қазіргі таңда дәстүрлі ыдыс-аяқтарымыз қолданыстан шығып, орнын заманауи ыдыстар басты. Сондықтан, қазақтың дәстүрлі ыдыс-аяқтарын және ол жөніндегі танымдарын көпшілікке таныстыру, қалыптастыру мақсатында «Ыдыстар сыр шертеді...» атты көрме ұйымдастырылып отыр.

Ыдыс сөзінің мағыналық, әрі қолданыс ауқымы кең. Тұрмыста пайдаланылатын іші қуыс, шұңғыл, жайпақ келген барлық жабдықтар ыдыс деп аталады. Ыдысқа сұйықтық құюға, бұйымдар сақтауға, тасымалдауға арналған жабдықтар жатады. Ал ас-тағам әзірлеуге, ішіп-жеуге қолданылатын ыдыс түрлерін ыдыс-аяқ деп атайды.

Аталмыш көрмеде ерте кезден қазақтың тұрмысында пайдаланылған тері, ағаш, металл сияқты шикізат материалдарынан дайындалған ыдыс-аяқ түрлері қойылады.  

Дәстүрлі ыдыс-аяқ түрлерімен бірге қазақ тұрмысында жиі қолданылған сырттан сауда-саттық барысында келген түрлі фарфор, металлдан жасалған көптеген ыдыстар да ұсынылады.

Көрмеде қазақтың шаруашылық-тұрмыстағы қажеттіліктерін өтеуде маңызды рөл атқарған таза табиғи заттардан жасалған бұйымдарға басымдық берілді.

Көрме 2023 жылдың 07 сәуірі мен 02 мамыры аралығында өтеді.

Өтетін күні мен уақыты: 07 сәуір 2023 жыл, сағат 11.00

2023 жылдың 14 наурыз күні Қазақстан Республикасы Мемлекеттік орталық музейінде князь Азат Әкімбектің жеке коллекциясынан «Орталық Азия мен Кавказ халықтарының XVIII - XX ғғ. басындағы зергерлік бұйымдары» көрмесі ашылды. Көрмеге түрлі халықтардың - қазақтардың, қырғыздардың, түрікмендердің, өзбектердің, ұйғырлардың, қарақалпақтардың және т. б. тарихи - мәдени мұраларын бейнелейтін 200-ге жуық зергерлік бұйымдары қойылған.

Көрме келген қонақтарды дәстүрлі сәндік-қолданбалы өнердің жарқын үлгілерімен және этномәдени дәстүрлерді ғана емес, көшпелі халықтардың ғасырлар бойы тарихының қырларын бейнелейтін XVIII – XX ғасыр басындағы Орталық Азия мен Кавказ халықтарының жетістіктерімен таныстырды.

Көрмені ресми түрде ҚР Орталық музейінің директоры Р.Е. Харипова ашты, одан әрі тарих ғылымдарының докторы, ҚР еңбек сіңірген мәдениет қызметкері - С. Қ. Қозыбаев; "Невада-Семей" халықаралық антиядролық қозғалысының Вице-президенті, Олжас Сүлейменовтің баспасөз хатшысы – В.А. Жандаулетов; ҚР ұйғырлары этно-мәдени орталығының құрметті төрағасы - А.Б. Шардинов; ҚР Ұлттық кітапханасының директоры - Б.К.Оспанова және т.б. өз құттықтауларын білдірді.

Келушілер Орталық Азия мен Кавказ халықтарының зергерлік бұйымдарымен танысып қана қоймай, Азат Әкімбектің өмірі мен шығармашылық қызметі туралы деректі фильм көрді.

 Көрме 31 нарузыға дейін жалғасады.