Қазақстан Республикасының мемлекеттік орталық музейіне қарасты Ахмет және Ғазиза Жұбановтар мемориалды музейі Құрманғазы атындағы Қазақ ұлттық консерваториясының Аспаптық орындау факультеті арнайы фортепиано кафедрасы және «Art Forum of Kazakhstan» халықаралық шығармашылық ұйымымен бірлесіп КСРО Халық әртісі, Қазақ КСР Мемлекеттік сыйлығының лауреаты, профессор, композитор Жұбанова Ғазиза Ахметқызын еске алуға арналған «ӨНЕРМЕН ӨРІЛГЕН ӨМІР» еске алу кешін өткізді. Кеш аясында Ғазиза Жұбанова атындағы камералық залдың салтанатты ашылуы өтті. Шарада консерватория ректоры Нұркен Нұрғалиұлы мен Ғ. Жұбанованың шәкірті профессор Гүлжан Еркінқызы лента қиып, Ғазиза Жұбанованың қызы Дина Мәмбетова, шәкірті профессор Бейбіт Әбілұлы, ҚР МОМ директорының ғылыми жұмыстар жөніндегі орынбасары Ғ.Теміртон құттықтау сөз сөйледі. Кеш аясында Ахмет және Ғазиза Жұбановтардың мемориалды музейі көрме ұйымдастырды. Көрмеде Ғ.А. Жұбанованың өмірі мен шығармашылығына және ұстаздық жолына қатысты экспозициялар қойылды. Сонымен қатар келушілер назарына деректі фильм ұсынылды. Ал концерттік бағдарлама халық әртісі Бибігүл Төлегенованың арнайы бейне үндеуімен басталды. Б.Төлегенова Ғ. Жұбанова туралы естеліктерімен бөлісіп, ыстық ықыласын білдірді. Сондай-ақ Жапон елінің белгілі скрипкашысы Маюко Катсумураның да құттықтау бейне үндеуі көрсетілді. Кеште Ахмет Жұбанов, Ғазиза Жұбанова, Әлиби Мәмбетов-Жұбанов, Гүлжан Өзенбаева, Карина Измаиловалардың шығармаларын ҚР еңбек сіңірген қайраткері, композитор, арнайы фортепиано кафедрасының профессоры Гүлжан Еркінқызы Өзенбаева және Құрманғазы атындағы Қазақ ұлттық консерваториясының студенттері Ақмарал Мықтыбаева, Айдана Салы, Амина Хамзина, Хан Хий Джон, Арайлым Карибай, Ашот Мхитарян, Нұрсұлтан Амангелді, ҚР Мәдениет саласының үздігі, Халықаралық конкурстардың лауреаты, вокал кафедрасының доценті Гүлнар Асылбекқызы Нұрғалиева және халықаралық байқаулардың лауреаттары Ерназар Ғимарат, Нұржан Жүсіп, Олжас Сәтпаев, Рахат Мұратәлі аспаптық және вокалдық шығармаларды орындады. Кеш соңында келушілер арнайы ұйымдастырылған көрмені тамашалап, шарадан алған әсерлерімен бөлісті.

ҚР Мемлекеттік орталық музейінде Армения, Беларуссия, Ресей, Тәжікстан, Түркіменстан және Өзбекстан елдерінен әскери медицина саласын талқылауға арнайы келген делагация өкілдері қонақта болды. Қазақстанның бай тарихы мен мәдениетіне қызығушылық танытқан ТМД делегаттары музей залдарын аралап, оларға арнайы экскурция да жүргізілді.

2023 жылдың 16 қарашасы күні ҚР Мәдениет және ақпарат министрлігінің тікелей қолдауымен және Министрлікке қарасты жоғары оқу орындарының қатысуымен Студенттер күніне арналған «Музейдегі сол бір кеш» атты мәдени-танымдық шара өтті. Жобаның бас серіктесі – Т.Жүргенов атындағы Қазақ ұлттық өнер академиясы.

Шараның басты мақсаты – студенттерді халқымыздың тарихи-мәдени құндылықтарымен таныстыру, жастардың рухани білімін арттыру, олардың шығармашылық қабілеттерін шыңдау және музейдің жоғары оқу орындарымен байланысын нығайту. Сондай-ақ, аталмыш жоба ата-бабаларымыздан жеткен тарихи мұралар мен құндылықтарды құрметтейтін мамандарды қалыптастыруға, студенттердің музей қызметкерінің кәсібіне деген қызығушылығын арттыруға бағытталған.

Мерекелік кеш Т.Жүргенов атындағы өнер академиясы студенттерінің орындауындағы классикалық вальс биімен басталды. Кештің ашылу салтанатында құттықтау сөз сөйлеген Орталық музейдің директоры Р.Е.Харипова мен жобаның бас серіктесі Т.Жүргенов атындағы қазақ ұлттық өнер академиясының әлеуметтік-тәрбие жұмысы және жастар саясаты жөніндегі бөлім басшысы Н.Қ.Сағынаев студенттерге оқуда табыс тілеп, мерекенің құрметті қонақтары ҚР Еңбек сіңірген қайраткері, «Құрмет», «Парасат» ордендерінің иегері Болат Әбділмановқа, ҚР еңбек сіңірген өнер қайраткері, еліміздің түрлі сахналарында 200-ден астам театр қойылымдарын жүзеге асырған Қазақстанның белгілі сценографы Есенгелді Тұяқовқа және кәсіпқой боксшы Қанат Исламға алғыс хаттар табыс етті.

Қазақстан өнеріне еңбек сіңірген мәртебелі қонақтармен кездесу музейдің залдарында жалғасты. ҚР Еңбек сіңірген қайраткері, «Құрмет», «Парасат» ордендерінің иегері Болат Әбділманов актерлік шеберлік, актерлік өнер шеберханасы туралы әңгіме қозғаса, ҚР еңбек сіңірген өнер қайраткері, 200-ден астам театр қойылымдарын жүзеге асырған Қазақстанның белгілі сценографы Есенгелді Тұяқов сахнаны безендіру мен көркем образдарды жасау құпияларымен бөлісті. Аты аңызға айналған сценографпен кездесу оның шығармашылығына арналған «Сценография: сахнада 50 жыл» көрмесінің аясында өтті. Мұнда көпшілік назарына Есенгелді Жұмағұлұлы жасаған сахналардың эскиздері мен макеттері, кейіпкерлердің түрлі костюмдері ұсынылды.

Жоба аясындағы тағы бір айтулы мереке - «Домбыра пати» сайысы. Бәсекеге қатысушылар Абай Құнанбайұлы, Махамбет Өтемісұлы және Біржан салдың домбыраларының көшірмелерінде ойнау мүмкіндігіне ие болды. Ал «Ойшылдар алаңы» ғылыми-танымдық ойынына қатысқан жастар тапқырлықтары мен білімдерін паш етсе, көңілді тапқырлар «Музей кубогі» үшін өткізілген КВН сайысында бақ сынады. Шараның белсенді қатысушыларына түрлі бағалы сыйлықтар мен музейдің алтын және антропология залдарына тегін билеттер сыйланды.

Жоба барысында студенттерге арналған шеберлік сабақтары да ұмыт қалған жоқ. Т.Жүргенов атындағы өнер академиясы Сәндік өнер кафедрасының зергерлік өнер лабораториясының меңгерушісі Е.Қ.Тәжібаев білезіктерге ою салу бойынша сабақ өткізсе, Б.Қоңыр, Е.Бақытжан, Е.Ақасин сынды шеберлер керамика, әшекей бұйымдары мен киіз өңдеудің құпияларымен бөлісті. Сондай-ақ, Т.Жүргенов атындағы Өнер академиясы жанындағы «станокта сурет салу» мамандарын дайындайтын колледж ұстаздары мен шәкірттері кескіндеме бойынша шеберлік сабағын өткізді. Шара барысында «Этно тақия» ЖК ұсынған ұлттық бас киімдер мен «Атоми» компаниясы ұсынған косметикалардың сатылым көрмелері ұйымдастырылды.

Байқаулар мен сайыс жеңімпаздары Алғыс хаттар және сыйлықтармен марапатталған кеш мерекелік концертке ұласты.

Шара демеушілері: ҚР Ұлттық кітапханасы, ҚР Кітап палатасы, «Мектеп баспасы» ЖШС, «Отбасы хрестоматиясы» қоғамдық қоры, Жазушылар одағы, «Атоми» компаниясы, «Этно тақия» ЖК.

«Музейдегі сол бір кеш» мерекелік шарасына ҚР Ұлттық Қауіпсіздік комитеті Шекара қызметі Академиясының, Т.Жүргенов атындағы Қазақ ұлттық өнер академиясының, Әл-Фараби атындағы Қазақ Ұлттық университетінің, Абай атындағы Қазақ Ұлттық педагогикалық университетінің, Қ.Сәтбаев атындағы Қазақ Ұлттық техникалық университетінің, Қазақ Ұлттық аграрлық университетінің, Қазақ Ұлттық қыздар педагогикалық университетінің, Қазақ Халықаралық қатынастар университетінің, Абылай хан атындағы Қазақ халықаралық қатынастар мен әлем тілдері университетінің, Халықаралық білім корпорациясының, О.Таңсықбаев атындағы Алматы сәндік-қолданбалы өнер колледжінің, Т.Жүргенов атындағы Қазақ ұлттық өнер академиясы колледжінің және Алматы сән және дизайн колледжінің студенттері қатысты.

ҚР Мемлекеттік орталық музейіне «Мадияр-Тұран» қоғамдық қорының белді өкілдері Иозеф Фехерис, Кристиан және Норберт Фулекилер арнайы келіп, ежелгі қазақ мәдениетімен жете танысты. Ұзақ жылдан бері көшпелілер өркениетін зерттеп, оны еуропа елдеріне танытып жүрген мажарлықтар алдағы уақытта да тарихи отанының құндылықтарын насихаттауды жалғастыра бермек.